Upplestur á aðventu laugardaginn 14. desember kl. 15:00.

Uppskeruhátíð ferðaþjónustunnar á Norðurlandi fór fram á Norðurhjarasvæðinu í gær, þar sem ferðaþjónustuaðilar komu saman, kynntu starfsemi sína og fögnuðu árangri liðins árs. Á hátíðinni voru veittar viðurkenningar í þremur flokkum. Elínar S. Sigurðardóttur, forstöðumaður Heimilisiðnaðarsafnsins á Blönduósi var á meðal þeirra sem fékk verðskuldaða viðurkenningu fyrir góð störf. Áratuga starf Elínar lykilþáttur í uppbyggingu safnsins Elín hefur veitt Heimilisiðnaðarsafninu forstöðu frá árinu 1993 og gegnt lykilhlutverki í að byggja upp þá menningarstofnun sem safnið er í dag. Safnið er einstakt á landsvísu og sinnir fjölbreyttu hlutverki í sýningahaldi, rannsóknum, fræðslu og miðlun menningararfs sem tengist heimilisiðnaði og daglegu lífi fyrri tíma. Á hverju ári heimsækja um 4.000 gestir safnið, bæði innlendir og erlendir ferðamenn, og hefur Elín lagt metnað í að tryggja fagleg vinnubrögð, öflugt samstarf við önnur söfn og virka þátttöku í þróun ferðaþjónustu á Norðurlandi. Markaðsstofa Norðurlands segir Elínu eiga „óumdeilanlega stærstan þátt“ í að safnið hafi fest sig í sessi sem áhugaverður og menningarlega mikilvægur viðkomustaður. Arctic Sea Tours og Fræðasetur um forystufé einnig heiðruð Auk Elínar hlutu tvö verkefni viðurkenningar á hátíðinni. Arctic Sea Tours á Dalvík var valið Fyrirtæki ársins fyrir stöðuga uppbyggingu, nýsköpun og metnaðarfulla þróun hvalaskoðunarferða allt árið. Fyrirtækið hefur eflt vetrarferðaþjónustu á svæðinu og verið leiðandi í öryggis- og gæðamálum. Hvatningarverðlaunin hlutu Daníel Hansen og Fræðasetur um forystufé á Svalbarði í Þistilfirði, sem hefur skapað einstaka upplifun þar sem saga, búskaparhefð og menning fléttast saman.

Fjölbreytt starf og góð aðsókn

Á Konudaginn, sunnudaginn 22. febrúar, tekur Heimilisiðnaðarsafnið þátt í samstarfsverkefninu Sunnudagar á safni á Norðurlandi vestra. Þar gefst gestum kostur á að heimsækja safnið og njóta fjölbreyttrar dagskrár í menningarlegu og notalegu umhverfi. Safnið verður opið frá kl. 14–17. Aðgangseyrir er 1.900 krónur, frítt fyrir börn 16 ára og yngri. Vakin er athygli á að ekki er posi á staðnum. Heimilisiðnaðarsafnið varðveitir og miðlar ríkulegum arfi íslensks handverks og textíls, þar sem gestir fá innsýn í sögu, listfengi og kunnáttu fyrri kynslóða. Sýningar safnsins endurspegla mikilvægi heimilisiðnaðar í íslensku samfélagi og bjóða upp á fróðlega og lifandi upplifun fyrir alla aldurshópa. Allir eru hjartanlega velkomnir að fagna Konudeginum á Heimilisiðnaðarsafninu og nýta þetta góða tækifæri til að kynnast menningararfi svæðisins.

Birgitta, Reynir og Þórdís Fjölmenni var við Upplestur á aðventu í Heimilisiðnaðarsafninu síðastliðinn sunnudag 7. desember. Þar mættu þau Reynir Finndal Grétarsson sem las upp og kynnti bækur sínar "Fjórar árstíðir" sem er ævisaga og glæpasöguna " Líf". Birgitta Halldórsdóttir kynnti og las upp úr bókinni "Horft til stjarnanna" sem mun koma út sem hljóðbók í janúar n.k. og Þórdís Einarsdóttir kynnti og las upp úr ljóðabók sinni "Unglingur á hafi úti". Mikil stemning og ljúft andrúmsloft myndaðist á milli gesta og höfunda og í lokin þáðu viðstaddir heitan súkkulaðidrykk og smákökur í anda jólanna.

Jón Björnsson frá Húnsstöðum, sálfræðingur og rithöfundur mun halda fyrirlestur í safninu sunnudaginn 9. nóvember kl. 14:00. Fyrirlesturinn nefnir hann: Um engla. Að afloknum fyrirlestri verður boðið upp á spjall við Jón, kaffi og meðlæti að hætti safnsins. Allir eru velkomnir og ókeypis aðgangur. Uppfært Sunnudaginn 9. nóvember flutti Jón Björnsson frá Húnsstöðum, sálfræðingur og rithöfundur, fyrirlestur í safninu sem bar yfirskriftina „Um Engla“. Fjallaði Jón þar um margskonar engla sem sagðir eru ósýnilegar verur sem þjóna drottni og vegsama hann og gegna mismunandi hlutverkum í boði drottins. Þrátt fyrir ósýnileikann hafa listamenn um aldir myndgert engla og sýndi Jón fjölmörg dæmi um þá merkilegu listsköpun. Sennilega kom áheyrendum mest á óvart að skráðir eru um 4300 englar sem sögur eru til um og gegna mismunandi hlutverkum við að halda jörð og himintunglum í þokkalega föstum skorðum að boði drottins allsherjar, en að auki eru þeir eilífir. Á sposkan hátt eins og Jóni er einum lagið, tengdi hann umfjöllunarefnið við mannheima í dag. Góður rómur var gerður að erindi Jóns og sköpuðust líflegar umræður á milli Jóns og áheyranda. Í lokin þáðu viðstaddir kaffi og ástarpunga að hætti safnsins.

Á farskólanum á Selfossi hlutu fjórir einstaklingar nafnbótina heiðursfélagi FÍSOS. Öll eiga þau sameiginlegt að hafa sinnt safnamálum af miklum metnaði í gegnum tíðina og tekið virkan þátt í samfélagi safnafólks. Þau eru þau Elín S. Sigurðardóttir, Frosti F. Jóhannsson, Guðmundur Ólafsson og Inga Jónsdóttir. Voru þrjú þeirra tilnefnd á aðalfundi félagsins þann 1. október og Elín hlaut svo sína tilnefningu við lok farskólans 3. október. Meðfylgjandi myndir tók Hörður Geirsson, sérlegur ljósmyndari farskólans.

Stofutónleikar sunnudaginn 20. júlí kl. 15:00 Píanóleikarinn og söngkonan Sigurdís Sandra Tryggvadóttir frá Ártúnum, kemur fram með evrópska tríóið sitt: pólska kontrabassaleikarann Mariusz Praśniewski og ungverska trommuleikarann Péter Horváth. Þau flytja frumsamin verk Sigurdísar, innblásin af náttúru heimahaganna í Austur-Húnavatnssýslu, auk laga við ljóð eftir afabróður hennar, Jónas Tryggvason. Eftir tónleika verður boðið upp á veitingar að hætti safnsins. Aðgangseyrir safnsins gildir.

Í landi síbreytilegs ljóss og órólegra sjávarfalla, þar sem ull hefur um aldir verið spunnin í hlýju og myndað minningar, prjónar Halla Lilja Ármannsdóttir sögur með þræði. Textíllistakona með djúpar rætur í prjónaskap, hefur hún verið samofin garni frá barnsaldri – fingur hennar lærðu taktfestu lykkjanna líkt og nótur á píanó. Halla er fædd og uppalin í Kópavogi en ferðalag hennar hefur einkennst af hreyfingu – milli landsvæða, greina og hefða. Sextán ára flutti hún norður til Akureyrar til að stunda nám við Menntaskólann á Akureyri, þar sem hún lagði stund á félagsgreinar. Árið 2015 dvaldi hún í París, reikaði um þröngar götur, lærði málið og upplifði áragamla list, áður en vindarnir báru hana aftur heim. Prjónaskapurinn var alltaf til staðar – þráður sem aldrei slitnaði. Stutt nám í sálfræði við Háskóla Íslands staðfesti aðeins hið óumflýjanlega: höndunum langaði að skapa. Árið 2018 fylgdi hún þeirri köllun til London, þar sem hún nam textílhönnun við London College of Fashion. Þar dýfði hún sér í alkemíu textíla – vél- og handprjóns, og uppgvötaði viðkvæman styrk Íslenska hrosshársins. Hún lauk námi með heiðursgráðu árið 2021 og sneri aftur heim með list sína – til upprunans. Heimurinn tók að veita athygli. Árið 2022 voru verk Höllu sýnd í danska sjónvarps þættinum Feldthaus og Bagger: í frjálsu lykkjufalli, sem síðar var sýndur á RÚV 2023. Hún hefur tvisvar tekið þátt í Hönnunar Mars, sýnt á Handverk og Hönnun, og lagt sitt af mörkum til að innleiða stafræna prjónavél hjá Textílmiðstöð Íslands. Sumarið 2024 hélt hún sína fyrstu einkasýningu, Samhljómur, í Kirsuberjatrénu, áður en hún hélt til Slóveníu til að kenna og miðla handverkinu með O2oop-textílhópnum. Fyrir Höllu er prjón meira en tækni – það er samtal við tímann sjálfan. Hún teygir á mörkum hefða, blandar saman fortíð og framtíð, mjúkri ull og ósveigjanlegu hrosshári, vélrænni nákvæmni og mannlegri snertingu. Verk hennar eru endurómur þeirra sem á undan komu – og hvísl til þeirra sem eftir munu fylgja. Skrifað af sýningastjóra, Corran Olivia Green Íslensk þýðing

“Skynið fyllir vitund” er heiti sérsýningar safnsins sem opnuð verður 1. júní nk. kl. 15:00. Sýningin er unnin af Björgu Eiríksdóttur